Minneblogg til far sin 100 årsdag

Min far, Sjur Jørdre (06.11.1921 – 08.05.2008)

Far ville ha vorte 100 år i dag, 6. november. Fødd og oppvaksen på Jørdre arbeidde han der heile sitt liv som gardbrukar. Ein arbeidsam kar som alltid stod på for å halde garden drivverdig og å drive han saman med mor, for å gje familien eit grunnlag for eit godt liv på Jørdre. Det var mange ting å gjera og far sa fleire gonger at han låg vaken om nettene av og til med tankar om kva som skulle prioriterast eller ikkje av alle dei gjeremåla han synes han aldri rakk heilt over. Slik var og slik er det nok framleis på ein mellomstor gard, der ein som bonde kan ha mange utmaningar i den daglege drifta. Noko av det far ofte var litt lei seg for var at han aldri heilt fekk tid til ei stor interesse han hadde heilt frå ungdomen. Det var trekkspelet. Diverre vart det lite speling for han opp gjennom åra, heilt til han på slutten av livet tok det fram av og til. Far var samfunnsinteressert og fylde godt med på politikken. Me hadde mang ei gong ganske så «oppheita» diskusjonar om politiske tema. Her fekk eg trena meg på argumentasjonar eg seinare har hatt god bruk for.

Diktet nedanfor vart skreve rett etter far døydde 8. mai 2008. Litt av ein dato også, for hans generasjon, sjølve frigjeringsdagen 1945! Fred vera med far sitt minne!

TIL FAR SITT MINNE (skreve i mai 2008)

Det står ein tom stol heime no

me fyller han med minner

Det står att ein tom kopp på kjøkenet no

me fyller han med minner

Eit langt liv er levd

mykje arbeid og slit har det krevd

Ei epoke av røynsler er over

Det gode med alt dette er;

at livet er stort,

at livet er mangfaldigt

Eit stort tomrom er det etter deg, far

Men me skal fylle det med gode minner

og varme kjensler

Ei anna reise har no byrja, far – god tur!